1
गांव मैं चोर होया करतो ‘गोरियो’
पक्को पाकेटमार हो, मानेड़ो सटोरियो
गयी खुद री बरात
ढुकाव वाळी रात
नेग करती सासुजी रो तोड़ लिन्यों बोरियो।
2
एम.एल.ए, रो चुनाव लड़्यो ‘सोमिये’ सरपंच
भागपाटै जीम लेतो, ना डीनर ना लंच
चढ र जातो ऊंट पर
गळी आळी कूंट पर
बणा लेतो ऊंट पर ही, जलसै रो मंच।
3
सरकारी पार्टी रो सचेतक हो ‘रोशन’
असैम्बली मैं राख्यो गयो ‘नोकोन्फीडैंस मोशन’
मंत्रिया री छवि ही खराब
असैम्बली मैं देणो हो जवाब
चै’रै उपर पोत’र लेग्यो मंत्रियां रै ‘लोशन’।
4
दान पुण्य कर्या करतो, ‘दीनानाथ दाबड़ा’
चीफ गैस्ट हो’र गयो, सम्मेलन मैं हावड़ा
रैया मजदूंरा रै संग
चढ्यो साम्यवादी रंग
कामलां री जिग्यां आ’र, बांटण लाग्या फावड़ा।
5
तसीलदार सलैक्ट होयो जणा मिस्टर ‘मिड्ढो।
जचै जीयां कर्या करतो आदमी हो चिड्ढो
जी मैं बींरे आयो
फर्नीचर बगायो-
अर’ दफ्तर मैं बैठग्यो ढाल’र पिड्ढो।
6
गालियां मैं गुब्बारा बेच्या करतो ‘रेवंतो’
चालतों ही फूंक स्यूं गुब्बारा भर देवंतो
ना पंप री जरूरत
पड़योडी ही लत
मुंडे स्यूं ही साईकिल री हवा भर लेंवतो।
7
गणित रो हिमतान देण गयो जणां ‘मेजर’
ढाई घंटा बैठ्यो रयो पर्चो बारै भेज’र
सुवाल कोनी आयो
पण नम्बर पूरा ल्यायो
अन्दर आली जेब मैं लको’र लेग्यो ‘पेजर’
