वै रच रैया षडयंत्र
तकनीक रै भेळै...
तकनीक बाळणजोगी
सगळो कीं गिटगी
होळै-होळै!
म्हारो बालपणौ
डम-डम डमरू
घूमर घालतो लट्टू
गिल्ली डंडा
म्हारा सुरेख लागणां रंग
सावण रा गीतड़ला
पणघट री चैंचाट
पैलदूज रमती चिड़कल्यां
सतोळियौ जमावता छोरा
राजा-राणी अर जुलमी राखस री
कहाण्यां...
कैबतां,आड्यां
कोसां री जातरा कर
सनैसो ल्यावता कागद
मिसरी घोळती बंसरी
मनुहार रा पीळा चावळ
सींझ्यां रा हरजस...
सै‘कीं छूट रैया है लारै
झर रैयो काण-कायदो
घिस रैयी है लाज!
अबै
टीवी, मोबाइल अर कम्प्यूटर री
लपलपावंती जीभां बिगसै
म्हैं जाणूं कै अबै
मिनख लुगाई अर टाबर
हुयग्या है गुलाम
तकनीक रा!
तकनीक रै
अंधारै रो ओ मारग
उण ठौड़ लैय जावैलो
जठै सूं पूठो आवणो
नीं हुवैलो सौ'रो
कदैई!
