तम्बाकू नैं छोड़ बावळा।
बेगो मूंडो मोड़ बावळा॥
जरदो गुटखो सुरती फांकै,
क्यांनै होडा-होड़ बावळा।
चिलमां अर, बीड़ी सिगरेटां,
तनडो लियो निचोड़ बावळा।
आंख्यां तो खाडा मं बडगी,
दूखण लाग्या जोड़ बावळा।
काळा-पीळा, दांत हो रह्या,
बिगड़ी जावै खोड़ बावळा।
खांसी-टीबी, दमा-केंन्सर,
रोगां को गठजोड़ बावळा।
बेमार्'यां की, भैण तम्बाकू,
ई सूं क्यांको कोड़ बावळा।
कर्क रोग को, तोड़ नहीं छै,
खर्च्यां रुप्या करोड़ बावळा।
गाड़ी-घोड़ा, खेत-गुवाडी,
बिकै रजाई, सोड़ बावळा।
जै सुख चावै, काया माया,
हेत राम सूं, जोड़ बावळा।
बाण खोडळी तजदे 'चंचल',
समझावूं कर जोड़ बावळा।
तम्बाकू नैं छोड़ बावळा।
बेगो मूंडो मोड़ बावळा॥
