सिंज्या हुगी
सैंसार रे चूल्ला मायें
बळगी पसूपणा री लाय
चढगी हिंसा री कड़ाई
उबळ रियौ मिनखां रौ लौई
चाल रिया है असत्र-ससत्र रा
झारा, कुड़छा, खुरपा, चिमचा
कट रियौ है मिनखपणो साग ज्यूं
सिक री है मन रै तवा-तवा
सवारथ री रोटियां
परोसीजगी राजनीति री थाळियां
थळी-थळी
थाळां-थाळां सजगी सत्ता री रंगीन मिठाई
लोभ-लालच रौ
भांत-भांत रौ मीठौ-चूंठौ
लम्बूटिया है सगळा ई होडा-होड
लागी है खोसम खोस
ठिमर-ठावका
बाजता बी
लड़ रिया बिनै पाण खातर
टाबर-टींगर जियान
तगड़ो मार लियौ
निरबळ रौ बी बंट
कीं रैग्या भूखा
कीं लियो इण जीमण रौ
सांगोपांग आणंद
बुझण लाग री है
समझ री सगळी बतियां
देखतां-देखतां
गहराण लाग री है काळी, अभखी रात
बिछा‘र लासां रा बिछावणां
ओढ‘र विधवंस री चादरां
अेक-अेक कर‘र सुवण लाग्या लोग
किती लाम्बी है आ रात
काटियां नी कटरी है आ रात
राम जाणै
पाछौ कद हुसी परभात
