तर-तर बधतौ जावै
सुपनां रौ विगसाव
अर सांच संकीजतौ-सधतौ।
हरमेस कुतरीजतीति
आपरी जड़ां रै ओळ-दोळे
सिमटण लागै
मिनख जद आपरी दीठ नैं।
नुंवा बागा पैराय
खुद सूं मूंडौ फोरण लागै।
कितरा दिनां तांई
नकार सकां
म्हां सूरज नैं आंख्यां मींच'र ?
किणी मिस
धार लेवां अंधारौ
अंतस रै मांय
पण उजियाळी देवैला
म्हारी आ साख
म्हारै समै री
सगळी बहियां रै पानां मांय।
मांडौ अर फेरूं
मेटता जावौ
म्हारी साख री ओळियां,
तर-तर बधैला
हुवतौ जावैला
सुपनां रौ विगसाव
छेवट सांभणी पड़ैला
सांच री जड़ा
मंडैला ई मंडैला
औ साख री ओळियां
समै री बहियां रै मांय।
