तारां छाई रात
बतावै बात
देखल्यो तारा नैं!
म्हारी प्रीत री डोर
पिरोया सारा नैं!
झिलमिल करता रैवै मुळकता
टिमटिम करता रैवै पळकता
दूर-दूर पण अजब अेकता
देखो गजब नजारां नैं
म्हारी प्रीत री डोर
पिरोया सारां नैं।
आदू जुग सूं उलटा लटकै
प्रीत-पग्योड़ा कदै नीं भटकै
संघे सगती कळजुगे रा
अै बिसराया नारां नैं
म्हारी प्रीत री डोर
पिरोया तारां नैं।
आकरसण-संगठण-सगती में
जद अै जड़ बेजोड़ बण्या है
तद चेतन हुयनै भी देखो
मिनख-मिनख क्यूं
खिंच्या-तण्या है!
तारां छाई रात
बतावै बात
देखल्यो तारां नैं
म्हारी प्रीत री डोर
पिरोया सारां नैं!
