थूं महान है
थारी महिमा अपरंपार है
इण सारू नीं के थारी माया सूं
दिन में सूरज चमकै–
अर रात में सितारा
इण सारू नीं के थूं संसार बणायौ
उणरौ वैभव बणायौ–
खेतियां-पुसप-सिनेमा-रेलां
इण सारू नीं के थूं समंदर बणायौ
उणरौ वैभव बणायौ–
माछळ्यां, बूंटा, पनडुब्बियां
अर जळपरियां।
म्हैं थनै इण सारू महान् मानूं हूं
के थूं खुद नै छोटो बणाय लेवै है
इतरो छोटो के, हूं कमजोर अर भाग्यहीण
म्हारै मांय थनै मौजूद पाऊं हू।
