गाभा सुखावती
जद निजर ओढणी रा पल्ला पै पड़ी
पल्ला री गांठ देख'र
म्हैं विचारती रैयगी
कदै घरवाळां रै रिसाणा व्हैवा री
डरपणी सूं
तो कदै भैंस दूध नीं देवण री वजै सूं
कदै नान्हा मोहनियै रै
नींदां मांय डरप जावण री वजै सूं
कदै पीहर मांय बैठी
माईतां री मांदगी री वजै सूं
नेन्ही-मोटी सगळी वज्यां सूं।
म्हां लुगायां री
सगळी ओढणियां रा पल्ला माथै
अेक गांठ बंधी व्हिया करै
बंधवा सूं अेक बिस्वास है
कै सगळो ठीक व्है जासी।
कदैई दानी-बूढी लुगायां
कैंवती कै
आ बात थे पल्लै गांठ बांधलो
अर ईं तरियां सूं
नीं जाणै कतरी बातां
अर कतरी वज्यां सूं
म्हां लुगायां
पल्ला में गांठ बांधी।
पण म्हैं आज भी विचारूं
कै कदै म्हां लुगायां री
चिंता मांय भी
किणी मिनख आपरी पाग मांय
गांठ बांधी व्हैसी!
कदै कोई मिनख
औ पक्को विस्वास
म्हां लुगायां नै दीधो व्है
औ म्हनै याद कोनी
औ विचारतां म्हनै पाछो
कांई याद आयो
अर म्हैं म्हारी
नूंवी ओढणी रा पल्ला पै
गांठ बांधवा लागी।
