क्यानैं करै कळेस, ओडी ड्योडी ऊठजा,
परण्योड़ो परदेस, बळत लगा मत बादळी।
सुगण मनाऊँ सूण, आलीजो नीं आवियो,
लगा मती थूँ लूण, बळत लगा मत बादळी।
पीव आवसी पास, पलक बिछावै पांवड़ा,
अगन लगावै आस, बळत लगा मत बादळी।
सेजां रो सिणगार, सुध बिसराई सायबो,
हिवड़ै उठै हुलार, बळत लगा मत बादळी।
पीव पीव कह पीव, महलां बैठ्यो मोरियो,
ज़बर जळावै जीव, बळत लगा मत बादळी।
गिण गिण घालै घाव, ब्हेवै मदरो बायरो,
चढ़ै मिलण रो चाव, बळत लगा मत बादळी।
मंडै मरण रो मूळ, सीळी सीळी सालरै,
सूनी सेजां सूळ, बळत लगा मत बादळी।
नींझर लागी नैण, ऄक पलक नीं आवड़ै,
रोय बिताऊं रैण, बळत लगा मत बादळी।
काग कंठ में रोग, आम फलै जद नीपजै,
भाग लिखेड़ा भोग, बळत लगा मत बादळी।
