डाळ रै पानां

अर फूल री पांख्यां जैड़ी है

मिंत! थारी ओळूं री बातां अर ख्यातां

जद-जद ओळूं आवै

लागै कै की पानां ओजूं हस्या कच्च

होय'र झूल रैया है

म्हारै हिया नैं हिंडाय रैया है

मिंत! पानां अर यादों में

घणो फरक है।

देखतो-दिखातो नीं

छानो-मानो भेद दीसतो

पानां रुत वसंत मांय झड़ सकै

रूंख रै जड़ां मांय पड्या पान

ओळू नैं जाडी करै

पण, ओळू री बातां तो कदैई नीं नसावै

तो धन री ठौड़ है

वैरागण नीं, राग-रागणी है

जकी सांसां में सुरां सूं साध्यां आवै

अर जद-कद भी सुर फूटै

म्हनैं पंचम रुचै।

जिण में गायां सबदां रो नाद

हिया नैं अक अजीब हरख देवै

म्हारो रोम-रोम हरखीजै

डाळ रै पानां ज्यूं मगरा रै मथारै

केस सूं उडता बादळां रै ज्यूं

मन में चौईतूं घड़ी दीसै

सरवर पे उठती लैरां ज्यूं।

स्रोत
  • पोथी : मंडाण ,
  • सिरजक : रीना मेनारिया ,
  • संपादक : नीरज दइया ,
  • प्रकाशक : राजस्थानी भाषा, साहित्य एवं संस्कृति अकादमी ,
  • संस्करण : Prtham