फिरतो-घिरतो
फागण आयो है
नूंवी कूंपळां साथै
नूंवो उजास,
नूंवो विस्वास,
नूंवी आस,
नूंवी उमंग लायो है!
हरदम हरखावण रो हेत
बिरछ-जूण री कीरत
पग-पग मुळकती
हवा रै हींडै मांय
नित-नित बायरै सूं
हिल-जुल बांथेड़ा करती
सूरज री सगती सूं
लुळती-डुळती बधै
छेवट खिलनै...
मुळकतै फूलां सूं
सौरमड़ी बांटै दराजै-दराजै
आ समै री सौरम
कुदरत री बदळती-बिगड़ती
सांसां मांय रम जावै...
इण बिगड़ती हालात सूं
स्याणां नै ठाह पड़ै कै
प्रदूसण रो रोग लागग्यो
उगती उमर माथै
चट्टान आय'र पड़ग्यो
अबै पूरो रूंखड़ो कुमळावै
ओ देस रा धणियां!
थारै थकां
काची कूंपळां माथै
ओ काचो काज किंयां?
भला भाया ! अबै लग तो
म्हारौ खिलतो हो संसार
अर अबै तो
म्रिगतिसणा दांई भंवतो रेवैला
कितरा दिन फळैला-फूलैला?
