अरज करूं अे कुबदां अबकै,
नई साल में मत करज्यो।
छाना-माना नैं रहवो तो,
गई साल सूं कम करज्यो॥
बेट्यां नैं क्हबो लाचारी,
भीड़ बंटाबो बेटां की।
छानैं-ओलै, चोरी-चोरी,
जाँच कराबो पेटां की।
गर्भवास में मारा-मारी,
नई साल में मत करज्यो।
छाना-माना......।१।
दान दायजो, होड़ा-होड़ी,
थोथा खरचा सावा म्हं।
परण्यां पाछै माथा-फोड़ी,
हाय-धाय मुकलावा म्हं।
दायज खातर छोड़ा-छोड़ी,
नई साल में मत करज्यो।
छाना-माना......।२।
गाँजो चिलम तमाखू पीबो,
अमल बांटबो मौसर म्हं।
जरदो-खैणी, गुटखा खाबो,
दांव लगाबो चौसर म्हं।
दारू पी, मारूड़ी गाबो,
नई साल में मत करज्यो।
छाना-माना......।३।
झूंठ कपट जंजाळ रचाबो,
ठाला बैठ हथायां म्हं।
भायां मांही फूट पटकबो,
झगड़ो लोग-लुगायां म्हं।
वोटां खातर लाय लगाबो,
नई साल में मत करज्यो।
छाना-माना......।४।
राजनीति की पाट पुजाबो,
ले'र धर्म की खड़तांळा।
छट्ठै महिनैं हाट सजाबो,
धरणां जलसा हड़तांळा।
नेक काम में टांग अड़ाबो,
नई साल में मत करज्यो।
छाना-माना......।५।
कोठा भर-भर, जुड़बो ताळा,
लूट मचाबो भावा म्हं।
दो नंबर का धन्धा काळा,
और मिलावट मावा म्हं।
'चंचल' बेईमानी जाळा,
नई साल में मत करज्यो।
छाना-माना......।६।
