म्हैं नित बोलू मिनखा सागै
हेत प्रीत री बातां
कैवू सैंग जणा नै
अरज करुं म्हैं
भरमां रै अन्धारा सूं
सै बारै आवौ
अपणायत रा गीत सुणावौ।
साची बात सदा ई जग मैं
रैवै साची
साचा आखर सदा मन्डीजै
भीतां माथै
मिनख सुणै अर घणां सरावै
जलमां-जलमां
वै इज आखर
मिनंखा रै नित सांमी आवै।
इण जगती रै अन्धारा सूं
लड़णौ पड़सी
साच धार मन मांय
जगत रै सांमी आय ' र
पख उणरौ इज
घणै हेत खमठोक
सदा ई लेणौ पड़सी
सगळां नै आ कैणौ पड़सी।
इण सारु ई म्हैं नित बोलूं
मिनखां जैडा़ मिनखां नै
म्हैं सागै राखूं
मून धार नीं बैठूं
म्हैं म्हारौ नित फरज निभावूं,
हेत प्रीत री
सगळी बातां सदा सरावूं।
