जगत बणाणियो आ मिनख जूण
घण निरांत में बैठ’र घण निपुणाई सूं बणाई
इण रचणा खातर बो विधणा
कितोई बिखो काट्यो हुसी
इण में कोई दो राय नी कै
मिनख रै बंधवा सागै अणूथो अंधारो छंट’र
उजाळा री झालर तणगी
इण तरै सूं मिनख विसालता री मूरत बणग्यो
ओ मिनख नूवां विचारां रो घर हुइग्यो
एड़ो जीवण जिस्यो मिनख रो
दुनिया में फेर कठैई शायद इज मिलै
आ कुदरत री देण अेक मातर मिनख ने मिली
पण कानी देखूं तो यूं लागै
जुग पर जुग बीतणै उपरांत इण में ऊपर-ऊपर’ ली सफलता
भले ही हिलूंरा लेवण लागी
जीवण री ऊंडी अर आतम चेतणा री सफलता
को पाई नीं
लूंठो अर फूठरो मिनखपणो
सतरंग इन्दरधनख रै ज्यूं
पसरतो नीं दिखणो चाहिजै
दिखावा सूं मिनख नीं बणै
मिनखाचार सूं मिनख बणै
आज री बगत मिंनख रे माजना में
आ कांई फेर बदळ हुइगो के
ओ आपणै जीवण रूपी बळद नैं
भाटा में हांकण लाग्यो
इण नैं रूपाळी माटी रा खेत
अर भाटा सूं भरी डूंगरी रो खयाल कोनी रह्यो
आ दुखती बात है
मिनख, मिनख नै मार’र राजी हुसी
मिनख, मिनख पर ‘आघात कर’ खुसी मनासी
इस्यो बोदो टैम और कद समझ्यो जासी
इण हरकतां सूं किण तरे मिनख जूण उजागर हुवैली
जिन्दगाणी तो दिवलै री जोत ज्यूं बळणै सूं सफळ हुवै
जिन्दगाणी तो त्याग सूं अर माटी में मिळ’र
बलिदान होवण सूं अमर हुवै।
