1
होठां रो दूध
सूक्यो ई कोनी
उण सूं पैलां ईं
हांचळां में दूध
सांचरग्यो।
2
खास वै कोनी
जिका आम नैं
चूस’र चलाय देवै।
खास वै है
जिका गुठली नैं
आम बणाय देवै।
3
सहर मांय
भणबा वाळा
टाबरां नैं
आ ठा कोनी
कै कुण-कुण री
मांवां नैं
कितरो-कितरो
गैणो बेच्यो है।
4
अनौपचारिकतावां री
हाट में ठाठ सूं
औपचारिकतावां
इयां बैठी है
जियां बाल विधवा
सुरमो सार’र
5
बाप री
गाढी कमाई
मंगळामुखी रै
लेखै लगाई
पल्ला लेवै
सगी लुगाई।
