खेजड़ी, रुत आयां पांघरसी
छांग्यो लूंग टाटड्यां तांई
नागी बूची कर दी,
लाज लूंट ली आं निमल्यां री
लूंठां जोरांमरदी,
भरयै सियाळै डांफर पाळै
साव उघाड़ी ठरसी।
खेजड़ी, रुत आयां पांघरसी।
बै तपता बैसाख जोठ रा
महीनां मिनख भुलाया,
सावणियै रा सपनां देख्या
ईं री ठंडी छांयां,
पण कुदरत दातार, बापड़ी
फेर फूलसी फळसी।
खेजड़ी रूत आयां पाघरसी।
कूर कुंआरी रै के लागै
देखै काची पाकी?
खुद रै कुळ नै विणसै लारै
लाग्यो डांडो डाकी,
घर रै भैदू बिनां काम अै
दूजो कुण कर सकसी?
खेजड़ी, रूत आयां पांघरसी।
