कविता मांडणौ
घणौ दोरो काम लागै
म्हूं लुगाई नै
बळद हांकणा
अर ढोर-ढिंगरा नै चरावणो
खेता सूं रोज
चुल्हों फुकवा खातर बळीतो लावणो
गवां रा
हरया-भरया खेतां माय पाणत करणी
नान्हां टाबरां रै
वास्तै कदी जौ
तो कदी बाजरी री राबडी रांधणी
म्हनै वत्तो सौरो लागे
कदै विचारू कविता री नान्ही-नान्ही रेखावां
खेत मांय उग जासी
ज्यूं नान्हां गंउ खेतर मांय उगै
अर कदी पाणत करता
कादा सूं भरया म्हारा पगल्या
सूखी जग्या मण्डै
वीं तर्या कवितावां री
नान्ही-नान्ही ओळ्यां पाछे-पाछे उग जासी
अर म्हनै देख र मुळकवा लाग’सी॥
