फुरसत री वेळा
म्हारै मांची री दावण खींचण
अर आपरै सिगार रो
सुट्टो खींचण मांय
उतरो'ईज फरक है
जितरो बळबळती लूवां मांय
मजूर रै माथै सूं टपकतै पसीनै
अर अेसी सूं रिसतै 'डक्ट वाटर' मांय।
ओ फरक आप
जमीन माथै चालण वाळी
हळ री नोक अर
चैक-बुक माथै चालण वाळी
कलम री नोक मांय ई
देख सको।
आप मांडो तिजोरी
म्हे खळो!
आप रुतबो-
म्हे रिस्ता!
आप लालसा
म्हे संतोष।
म्हे नीं अपणावां
चालबाजियां...
नीं करां आप सूं होड़!
पण सावचेत रैयज्यो
उघाड़ै-उभाणै
अर निरणै पेटां सूं ईज
रचीजिया करै
इंकलाब।
