जीवण व्हैगौ दोरौ
सोरौ बणावण रा फेर में
पल-पल मरतौ मिनख
क्यूं लेवै सुपना
सुरंगा काल रा?
कैड़ी विवसता है!
इण आपाधापी में,
आगे निकळण री होड में
गमगौ
जीवण-संगीत
क्यूं कोनी सुणां आज
आपां आं टाबरां रै
कण्ठां बैठी मीठी बातां
यांरै मन री
कंवळी पालर बातां
क्यूं कोनी दीखै, आज आपांनै
आं टाबरां रै मूंडै बापरियौड़ी
एक उदासी,
क्यूं बैच रैया हां आपां
आं रौ बाळपणौ
भविस री तनखा पेटै
क्यूं कूंतण लागग्यां हां आपां
आपांणै टाबरां नै
फगत किताबी पढ़ाई री दीठ सूं?
जीवण-पढ़ाई बायरी आ पीढ़ी
कीकर राजी रेवैला
अर राखैला?
आज रा अकरमी जीव
ए टाबर
जिकां सूं खोस लीनौ
आपां आं रौ बाळपणौ
समझ बावड़ियां रै पैला इज
अर पकड़ाय दीनी
मोटी - मोटी पोथियां
आं रा हाथां में
रटण सारू
कांधै मे'ल दीना
भारी बस्ता
जाणै
ज्ञान रौ बोझ
