घर में खेती—बाड़ी
हाट में ठेलां लगा लेवां।
नानो—मोटो धंधो कर,
दो—चार पाई कमा लेवां।
मुसीबतां मसळ देवां,
म्है गांव रा जवान हां॥
खा—पी'र बखत सर
काम माथै निकळ जावां।
सागै धर दो—चार रोटियां
घर रा सारा खरचा उठावां।
नित चालां नीं आराम करां,
जठै मिलै बठै ई काम करां।
म्है गांव रा जवान हां॥
दिनभर दिहाड़ी कर
चार पाई बचाय लेवां।
टाबरां रै चाकलेट, बिस्कुट
हरमेस परचूणी जंचाय लेवां।
कदै—कदै फाकां राखां
दिन हंसता बिताय देवां।
लाज—सरम नीं राखां,
मुसीबतां मुस्काय देवां।
म्है गांव रा जवान हां॥
म्है गावं रा जवान
सगळा काम कर लेवां।
मोटी सूं मोटी मुसीबत
खुद नै थाम उबार लेवां।
कदै कीं अर कीं
जुगाड़ कर लेवां।
म्है गांव रा जवान हां॥
