गाणी माणी, गाणी माणी
गळी-गळी छाणी
मिनख मिल्यो ना पाणी
गाणी माणी, गाणी माणी
तिल सरसूं पीड़ीजै घाणी
तेल गिटै नेताजी सारो
बीरा!
कीं आणी नी जाणी।
गाणी माणी, गाणी माणी।
आ बी राणी
वा बी राणी
कुण भरैलो पाणी।
गाणी माणी, गाणी माणी
दारू दड़कै खसमाखाणी
कठै टाबर कळपै धिराणी
डाकण जोबण कठै पिछाणी।
गाणी माणी, गाणी माणी
मोथा कतरै सगळी लाणी
भेड़ां रूळै नागी उभाणी
गाणी माणी, गाणी माणी
गुरुजी चढ़ग्या चक्करघाणी
पोलियो जनगणना अभियान
नित रेलियां बोटां रो काम
टाबर-टोळी रूठै गिनाणी।
