घणै चाव सैं खेती बोई सुइया झीणा झीणा जी
आसा रा सुर आंगळियां में बाजै मन री बीणा जी
ओसर ओसर बादळिया भी इमरत धार बरस रया जी
मैं जंगल रै मंगळ मांई...।
नाज खुडां सैं ऊपर आयो पीव रुखाळा अेकला
उमग उमग टपकै टापी रा झीणा मीणा छेकला
छाक लेर धण आयी खेतां पिव टापी से निसरया जी
अैं जंगळ रै मंगळ मांई...।
मूंग मोठिया लूमै फाळां चूंळां फैल्या नाळ जी
सिट्टा मुसकल टूटै डोका लाम्बा दो दो ताळ जी
गड्यै मतीरां री बेला रा नाळ दूर तक पसरया जी
अैं जंगळ रै मंगळ मांई...।
टिड्डी नईं कातरो अबकै अर बिरखा री खींच ना
भरी न्याव आ लागी नाकै तोफानां रो बीच ना
आवो थोड़ा तो सुसताल्यो घणा घणा क्यूं खसरया जी
अैं जंगळ रै मंगळ मांई...।
सुसतावां के गोरी गिगनां बादळियां रा ल्हूर जी
भरी न्याव मझ में ना मरवण पण तट थोड़ी दूर जी
पीरयूं सूंटो चाल्यो जैं सैं बूंटा आडा पसरया जी
अैं जंगळ रै मंगळ मांई...।
घणो बधेवो होसी पिव सा परवाई रै सूंटां में
पड़चल फूटै घणै नाज में निरखो ऊभा बूंटा नैं
मैं पड़चल पर ई तो पिवजी घणा गिरस्थी बसरया जी
अैं जंगळ रै मंगळ मांई...।
पड़चल चोखी फूटै पदमण पाणी पैरै डोकां में
खड़ी बाजरी काळी पड़ज्या परवाई रा झोंका में
गोरी बाजरी गोरी खासी अैं खातर म्हे खसरया जी
अैं जंगळ रै मंगळ मांई...।
काळो कैयां न्याऊ लाग्यो काळो रंग है बादल में
भैंस पदमणी रो रंग काळो काळो रंग है काजळ में
काळी काळी पलकां धण री जिण में पिवजी बसरया जी
अैं जंगळ रै मंगळ मांई...।
बिछा चाळको दोनूं बैठ्या खेजड़लै री छांव में
सुणी न घुळ घुळ के बतळाया प्रीतड़ली रै गांव में
थाळ राबड़ी रो हाथां में पीता पीता हंसरया जी
अैं जगळ रै मंगळ माई...।
पिछवा चालै भाळ बाजरो भर भर देरी छाज में
गावै गोरी गीत जीत रा निरखै पिव नै नाज में
हरख घणै बाथड़ल्यां मिल मिल कमर हेत में कसरयाजी
अैं जंगळ रै मंगळ मांई...।
