कमतर रो साथी अलगोजो,

करसै रो साथी अलगोजो,

मन री मौजां साथ करै

घुळ कानां बाती अलगोजो,

सुण इण री राग कमेड़ी री

अणमोल गटर गूं थम ज्यावै,

सुण इण री राग चिड़कल्यां री

चौफेरी चूं-चूं ढब ज्यावै,

गूंज पुगा दै मरवण नै

ढोलै री पाती अलगोजो।

मन री मौजां साथ करै

घुळ कानां बाती अलगोजो।

बो मींझर मधरो हिद झीणूं,

जद बवै बायरो मद भीणूं,

बाजै धरती आभै रो

दै भेळ अगूणूं-आथूणूं

हेतड़लै री लैर उठा

भर देवै छाती अलगोजो,

मन री मौजां साथ करै

घुळ कानां बाती अलगोजो

जद हुवै जेठ रा दिन टणका

जद भर्‌यो भादवो घहरावै,

जद खळो नीकळै काती में

जद चैत च्यानणी छिटकावै,

अेक सरीसो सै रुत में

सगळां रो साथी अलगोजो,

सपनां रो साथी अलगोजो

सुख-दुख रो साथी अलगोजो।

स्रोत
  • पोथी : कन्हैयालाल सेठिया समग्र (राजस्थानी) ,
  • सिरजक : कन्हैया लाल सेठिया ,
  • प्रकाशक : राजस्थान परिषद, कोलकाता ,
  • संस्करण : प्रथम
जुड़्योड़ा विसै