सरकारी सावो भारी है कैयां री
चंवरी मंड ज्यासी।
कैयां री चंवरी मंड ज्यासी कैयां
रा फेरा पड़ ज्यासी।
कैई परणी नें छोडेला नुंवां
हथलेवा जोड़ेला।
कैयां रे लारे डोलेला कैयां सूं
मीठा बोलेला।
कैयां सुं नातो तोड़ ताड़ कैयां सूं
कांटो भिड़ ज्यासी।
कैई घोड़ी चढकर आवेला तोरणं
माथे भिड़ ज्यावेला।
पब्लिक जावेली जानां में वोटां री
मेथी मिल ज्यासी।
कैयां रा लिगन लिखीजेला कैयां
री बंदौली निकळेला।
कैयां सुं नातो तोड़ ताड़ कैयां सूं
कांटो भिड़ ज्यासी।
कैयां री झंड्या लागेली कैयां रा
बाजा बाजेला।
कैयां री गाड्यां दौड़ेला कैयां रा
माथा फोडेला।
पांच साल री कुरसी रो कैयां ने
पट्टो मिल ज्यासी।
कैई नोटां सूं खेलेला बोतल रा
ढकणां खोलेला।
कैयां रा घर बण ज्यावेला कैई
सड़कां पर आवेला।
कैई जावेला बंगलां में कैयां री
बिल्डिंग बिक ज्यासी।
कैई सुख री सेजां सोवेला कैई
मांय मांयनें रोवेला।
कैई सीधा दिल्ली जावेला कैई
मुंह लटकायां आवेला।
कैयां री नावां डूबेली कैयां री
लाटरी लग ज्यासी।
कैई वादा करकर जावेला कैई
झूठा ख्वाब दिखावेला।
कैई कैई कैई जग्यां सूं आवेला।
भाषण पर भाषण दे देकर भोळी
जनता नें भरमासी।
कैयां कैयां रा चक्कर में कैयां
कैयां री टक्कर में।
कैई कैयां सूं मिल ज्यासी कैई
कैयां सूं भिड़ ज्यासी।
कैई कैई तो कैयां सूं कुरसी रा
सौदा कर ज्यासी।
कैई गाड्यां मांय घुमावेला कैई
करकर मनवार जिमावेला।
कैई रिश्तेदार बतावेला कैई
जाति भाई बणावेला।
वोटां री खातर बड़ा बड़ा चरणां में
थारे झुक ज्यासी।
कैयां री सांस उखड़ ज्यासी कैयां
नें दौरा पड़ ज्यासी।
कैयां री आंट निकल ज्यासी।
कैई कैयां रा केणां सूं गुड़णां
लोटा ज्यूं गुड़ ज्यासी।
