Quick Links

चैरौ - 1 

चैरो प्रेम रो
टेसण है
जठै प्यार री
हरेक गाडी नै
थमणो ई पड़ै

टोकनां री
अदळा-बदळी कर’र
गाडी आगलै
टेसण सारू
चाल पड़ै

पछै
आगली गाडी री
उडीक मांय
टेसण
कई ताळ
सूनो-सूनो सो
हो जावै
अर आगली गाडी ई
टेसण सारू
बेताब-सी रैवै।

 

चैरौ - 2

आतमा री
नदी रो
पाळियो है चैरो
जठै गमछो लपेट्यां
उघाड़ा विचरै विच्यार
न्हाय’र
आतमा री नदी मांय
सुखावता
अंडरवियर-बणियाण
धोती-कुड़ता

धोती तळै
अंडरवियर
पहरै है विच्यार।

स्रोत
  • पोथी : म्हैं अन्नदाता कोनी ,
  • सिरजक : रामस्वरूप किसान ,
  • प्रकाशक : बोधि प्रकाशन ,
  • संस्करण : प्रथम