आंतरा कमसी नदी अर प्यास में
बीतगी आखी सदी इण आस में।
बागबानी में बबूळ बिलायती
नील कमलां री कलम कीकर हुवै
चांद रा टुकड़ा नखत आकास रा
इण धरा री धूळ में कीकर भुंवै
आम अपणायत हुवै हर खास में
बीतगी आखी सदी इण आस में।
झूंठ री आंधी सुरंगां रै भँवर
सांच सोनल सांझ-सी भटकै कठै
टूटता बिस्वास-दरपण री डगर
भावनावां रूप नै निरखै कठै
प्रीत मिल जावै पड़ी परिहास में
बीतगी आखी सदी इण आस में।
समदरां सूं सेंत सगळी सीपियां
स्वाति-जळ सूं मांग मुकताहार री
रुस-रुत-राणी अटारी जा चढ़ी
कुण हवा सूं बात कह मनवार री
कद हुवै भेळप बहू अर सास में
नीठगी आखी सदी इण आस में।
आदमी सूं आदमी री जातरा
फकत आदमखोरड़ां सूं तै हुई
कद कट्या जंगळ खबर किण नै हुवै
मांद सूं ही मांद अणसैंदी हुई
पारधी पूरै चिड़ी री आस नै
बीतगी आखी सदी इण आस में।
