दूर सूं सुण ज्यांवती
रावण हत्था री मीठी धुण,
घर रै बारै आवतां ई
फूट पड़ता
उणरा कंठां सूं
मीठा गीतां रा झरणा।
ढोली-मारू री प्रीत
मोरां रै सासरिये री रीत..
मीठा गीतां रा
बोल सुण कै
म्हैं उणनै ई कैवण लाग्या
'बीरा बणजारा'।
गीत गांवता अर
कमांवता... हाँ गीत गांवता
अर कमांवता
थोड़ा सा पीसा,
स्यात कै माँग कै खाणो
वारी शान रै ख़िलाफ़ होया करतो।
नीमड़ी री छांयां मैं बैठ
भुआ सूं बतळावतां
माँ रा हाथ री ताती रोट्यां
सूं भर ज्यावंतो
उणरै हिरदै रो भंडार।
बदळा मैं आशीष सूं भर देवंता बै
थळी-आँगण और द्वार।
होळ्यां-होळ्यां बंद होग्यो
'बीरा बणजारा' रो आवणो
म्हारी गळी मांय।
अब तो कठै ई कोनी दीखै
गीत गांवतां, कमावतां
म्हारा 'बीरा बणजारा'।
