आज भळै
अखबार में समचार छप्यौ,
अस्पताल रै लारै
अेक लावारिस गीगौ लाध्यौ है
जकै नै कणां ई कागलां टांच्यौ है
अर कणां ई बोढ्या है बटका
भूखा गंडकां।
कणांई खेळी में
कणांई सड़क किनारै
कणांई रोई में
कणांई कंदेड़ा में
मिन्दर-मसीतां रै असवाड़ै-पसवाड़ै
मिलता ई रैवै
जींवता-धुड़कता
या भळै मरियोड़ा गीगला।
न्हाख जावै कोई अभागण
अंधारी रात में
भोर में फगत चरचा ई हुवै
सगळां री बात में,
हुवैली कोई कळजुगी मा
जकी लुकायौ है आपरै पाप नै
कोई क्यूं नीं भूंडै कळजुगी बाप नै
फगत लुगाई नै ई भुगतणा पड़ै
मिनख रै इण सराप नै।
मां बणनौ लुगाई जात सारू
गरब री बात है
पण जगत उणनै कुंती बणण सारू
कर देवै मजबूर
इणी रै कारण कोई कर्ण
मां सूं होज्यावै दूर।
लुगाई तौ धरती हुवै
बीज पड्यां उगा ई सी
नींस बांझ थरपीजसी
पण मिनख रा कुकरम
हरमेस रैवै बैदाग
धिक्कारीजै तौ फगत लुगाई ई।
औ कांई गिंगरथ
मिनखां री सोच
क्यूं है बांझ?
