बखत लारै छोरियां नै चालणौ पड़ै
जीवण तौ आपणौ ही यूं पाळणौ पड़ै
ई सरकसां में ना’र रै मुण्डा में रोज-रोज
खुद रो मुण्डो 'रेखा' हां घालणो पड़ै
लीला-लीला खेत री काची ई काकड़्यां
खिलखिल्या गुलाबां री वाळी ई पाखड़्यां
उलझ-उलझ सुळझ-सुळझ चढ़-चढ़ उतर-उतर
छोरियां जीवै है ज्यूं जाळां री माकड़्यां
हिवड़ा रै हाथां री ई मेहन्द्यां है राचणी
लोकगीतां री ई मीठी-मीठी रागणी
राधा री प्रीत या कान्हा री वांसुरी
मगन मीरा पगल्यां री घुघंर्या वाजणी
