आ दुनिया अेक बजार!
जठै आपां बेचां हां खुद नैं,
कीं और पावण खातर।
खुद नैं बेचा हां, नरा ई रूप में, नरी जग्या।
बेच सकां खुद नैं,
खुद का मांयला मनख नैं,
पण कदी खुद, खुद नैं कांई नीं खरीद सकां?
आ दुनिया अेक बजार!
जठै आपां मोल लेवां नरी चीजां,
आपणा टैम, आपणा सुपना
अर आतमा नैं बेच-
वै चीजां, जकी बिना ई चाल सकतो हो आपणो जीवण
आखी दुनिया मोल लेणो चावां हां, पण
कदी ई मोल लेबा की इच्छा नैं कांई नीं बेच सकां?
आ दुनिया अेक बजार!
जठै बिकै है, घर-गवाड़ी, मकान-दुकान
गाडी-घोड़ा अर प्रेम;
कदी कम मोल में, अर कदी बत्ता में-
बेचा हां, आपणै बाळपणै नैं
जवानी खातर
अर जवानी नैं बूढापा खातर
सब कर सकां, पण
ईं बजार में वैपार का बना कांई नीं की सकां?
