एक दिन
म्हनैं मिल्यो हो
लहराता खेता रे पसवाड़ै
हरियाती फसलां री चादर ओढ्यां
रेजा री बुगत्तरी में
उंगण-निंदियो गांव,
म्हैं
जागरण रा ढोल ढमाका लारै
मुळक’र गायी परभाती
लेवतो रैयो
सुख सपना सूं पाती
टुकड़ा-टुकड़ा में
देवतो रैयो विस्वास री बानगी
अर
किस्त दर किस्त
जागतो रैयो गांव
व्ही दिन
म्हैं देख्यो अठें
बादळ सूं बरसतो हेत
हवा सूं लहरातां खेत
रेत रा धोरा में
मुळकती मोठ बाजरी
अर
पसेवा सूं सिचियोड़ा गेला में
हरखावतो रैयो गांव
धीरे धीरे
उगमणा-उजास नें
लुभावण लागी आथूणी आभ
वन्दना का नाम पर
षड़यन्त्र,
अर नूंवी नूंवी करामात
बदळाव री बात पर
मौसम में उगबा लागी
लाल हरी बत्तियां
अर बाग बगीचां री जगै
पसरबा लागो कंकरीट रो जंगळ
आदमखोर बण शहर
निगळतो रीयो गांव
अबै
नी हरियावतां खेत
नी कूकती कोयलां
च्यारूमेर फिरै
धूळो उड़ाता इंजिन
संस्कृति रा गरब गुमान सूं
रीततो रोबोट सो आदमी
अर
पांगळा पगां सूं
पर जावतो गांव।
(लड़खड़ावतो गांव)
अबै म्हैं
सोध रैयो हूं
टूटा टूटा चेहरा में
म्हारो सुनेरो भूत
अतीत री मिनखात
मेळ मुलाकात
अर ईमान धरम सूं कहूं तो
व्हां पौथी
जी रा एक सफा पे गीता ही
दूजां पे कुरान
अस्यो हो म्हारो गांव
अणी’ज ठांव।
