अंतरदेसी कागद माथै-
'इणमें कीं मत राखजौ’
घणौ सारथक वाक्य है!
मतलब
टाइम-बम जैड़ी कोई चीज मत राखजौ
पण
वांनै कीकर समझावां
के सही जगै माथै
सही ढंग सूं
भरपूर सावचेती साथै
काम में लियड़ौ सबद इज
टाइम-बम सूं वत्तौ खतरनाक व्है
सरत आ है के कागद लिखणियौ
इण बात नै समझतौ व्है, जाणतौ व्है
सही ठौड़ सही सबद रौ
मैतव पिछाणतौ व्है ।
दुखड़ौ
साथी म्हारा
दुखड़ौ कदैई नपस्या नीं व्है
व्है सकै ई नीं-
चावै तौ उणसूं पूछलै
दुखड़ा जिकां नै मांजै नीं
घिस देवै!
असल में
मुझधार रा गीत
किनारै वाळा इज गाया कर
वै, जिका मझधार सूं
घणा आघा रैय जाया करै ।
