कमतर रो साथी अलगोजो,
करसै रो साथी अलगोजो,
ओ मन री मौजां साथ करै
घुळ कानां बाती अलगोजो,
सुण इण री राग कमेड़ी री
अणमोल गटर गूं थम ज्यावै,
सुण इण री राग चिड़कल्यां री
चौफेरी चूं-चूं ढब ज्यावै,
ओ गूंज पुगा दै मरवण नै
ढोलै री पाती अलगोजो।
ओ मन री मौजां साथ करै
घुळ कानां बाती अलगोजो।
बो मींझर मधरो हिद झीणूं,
जद बवै बायरो मद भीणूं,
ओ बाजै धरती आभै रो
दै भेळ अगूणूं-आथूणूं
ओ हेतड़लै री लैर उठा
भर देवै छाती अलगोजो,
ओ मन री मौजां साथ करै
घुळ कानां बाती अलगोजो
जद हुवै जेठ रा दिन टणका
जद भर्यो भादवो घहरावै,
जद खळो नीकळै काती में
जद चैत च्यानणी छिटकावै,
ओ अेक सरीसो सै रुत में
सगळां रो साथी अलगोजो,
सपनां रो साथी अलगोजो
सुख-दुख रो साथी अलगोजो।
