आजादी तो
मिनख रो मूळ सुभाव है
आ तो उण रै
नीतिगत भावां री नाव है!
मिनख ई क्यूं
प्राणी मात्र री
जलम जात ओलखाण है
आजादी...
पण इण रै सागै
ओ साच ई सूरज रै उनमान
साच कै आपरै
किणी न किणी
स्वारथ खातर
अबरबळी मिनख
निबळां रा कंठ मोसै!
इण आदम जात री
मदीयोड़ै मुलकां री
आज तांई री
गुलामी रो इतियास
इण कड़वा साच री साख भरै
अर आगै ई भरैला...
जग में जियां जितां दिन
आजादी रै मैतव रा
अपणायत री आब रा
जतन तो करणा पड़ैला।
