आपां कींकर बंटियोड़ा हां
क्यूं फाड़ां में फंटियोड़ा हां
सब मिनखां रो अेक राम है
अेक गोत सै जनम्योड़ा हां
किणरो रगत कळूंठो—धोळो
लाल रगत सै राच्योड़ा हां
कळ्यां—फूल हां भांत—भांत रा
अेक बाग सै खिलियोड़ा हां
हीरा—माणक रतन अमोलक
अेक हारियै जड़ियोड़ा हां
हिन्दू मुसळमान सिक्ख सै
इक माटी में रमियोड़ा हां
अेक आपणो कुटम्ब—कडूंबो
नैना—मोटा बंधियोड़ा हां
न्यात—जात है अेक आपणी
अेक डोर सै कसियोड़ा हां
श्याम; समझणा हां आपां, पण
मारग सूं क्यूं भटक्योड़ा हां।
