बो बींनै
नीं जाणै हो
अर बो ई
बींनै नीं जाणै हो
बां मांय कोई
बैर नीं हो
बां मांय कोई
दोसती अर दुसमणी रै
बिचाळै रो रिस्तो
भोत ठंडो हुवै
जठै लड़ाई री तो
गुंजाइस ई नीं हुवै
पछै कियां
बण-बींरै
गोळी मार दी
अर, बण
बीरै?
बींरै
देस रै अखबार मांय
खबर छपी
नूर मुहम्मद देस री
रुखाळी में मार्यो गयो
ठीक बीं खबर री
फोटू-कॉपी
बींरै
देस रै अखबार मांय ई
बीं रोज
दिनगै-दिनगै आय पूगी
फगत नांव माथै
सफेदी पोत
रतनलाल मांडयोड़ो हो
दो देसां रै
दो घरां मांय
मातम छायग्यो
कैय सकां
दो घरां रै
दो देसां मांय
मातम छायग्यो
देखतां-देखतां
दो देस उजड़ग्या
अर इणनै
अखबार
रुखाळी कैवै।
