जीमण जोगो धान राम आपांनै दे देसी।
गांव आपणैं पूठा चालां ओ बढ़िया रैसी॥
दिन भर घोट उठै धूंवै रा सांस लेवणो दोरो
मन मिचळावै जी घबरावै होवै है जी दोरो
परदूषण तन चूसण लाग्यो रैवै घणीं जळेसी
गांव आपणैं पूठा चालां ओ बढ़िया रैसी
चोरी सीना जोरी अठ्ठै होवै खून खराबी
भरै बजारां लाजां मरगी देख घणीं आबादी
बरबादी रो ढोल बाजर्यो बसग्या आ'य बिदेसी
गांव आपणैं पूठा चालां ओ बढ़िया रैसी
खेती करस्यां रूख उगास्यां चोखो राखां धीणो
छाछ राबड़ी करां कलेवो लांखां में लाखीणो
घड़ी पलक ना मनड़ो लागै बणग्या परदेसी
गांव आपणैं पूठा चालां ओ बढ़िया रैसी
काचर बोर मतीरा सीट्टा फळियां है पकवान
निरखण जोगो मरुधर म्हारो प्यारो राजस्थान
ठण्डो बायरियो काया थारी तिरपत कर देसी
गांव आपणैं पूठा चालां ओ बढ़िया रैसी
