म्हैं अर थूं
चाय रा कप को’नी
कै—
मेज माथै सूं पड़ां
अर टूट जावां,
आपां मिनख हां
जठां तक
नसां में उफणतौ खून है
हाथां में बळ है
अर मन में—
अथाग
अणमाप विसवास रौ
बळतौ दीवौ है,
आपां पड़ांलां
गुड़ांलां
मरांलां
टूटांलां
पंण मिटांला को’नी
इण अन्याव रै
बायरै री झपट सूं
इण ओछी
अनीत अर कपट सूं,
आपां लड़ांलां
अर घड़ांलां
अेक नुवै माणस रौ दीवौ
जिकौ—
झूंपड़ियां में
नुंवौ उजास भरैला
अर अनीत रौ अंधारौ
इण धरती सूं
अळगौ करैला।
