सै करै बातां रुपाळी गावती
फेफरी होठां जमी अणमावती
नींद सूं गाडा भरै नित रावळा
खार बुरकै पीड़ गोडां आवती
दांत मांजै खेत मांई बाजरी
मुळक खोवै साव सूनी जावती
हाथ में देखै मियादां बूढळी
बांचती जावै लकीरां पावती
डूंड उफणै बायरी फैताळ कर
भर तगारा दरप दूणा छावती
सै ठगारा मौज मांडै ठाट सूं
भीड़ ताकै बैठने खळ खावती
फूल रै बाज़ार बिकता आक ई
घींसणों गैरै छियां पळकावती
झूठ व्हैजा सांच चिकणी बात सूं
पावली गुड़ती फिरै धमकावती
देख 'मोहन' दीठ थारी आ खड़ी
व्हा बळत आडो करै बळखावती
