रैवणो घर में पड़ैला आ कदै जाणी बता
मानखो इण गत मरैला आ कदै जाणी बता
अेक दूजा सूं गळै न मिल सकां न छू सकां
हाथ मिलतां ई डरैला आ कदै जाणी बता
आपरो ई आपरै घर आवतां दुसमी लगै
आवतां घर गड़बड़ैला आ कदै जाणी बता
घर में रै’ता आंतरो गज दोय रो रखणो पड़ै
मास्क बिन घर नीं तजैला आ कदै जाणी बता
थटाथट बाजार सजिया रैवता हा सास्ता
उठै सन्नटा छवैला आ कदै जाणी बता
भरतार नै घर बुलावण नै उडाती धण काग ही
आज वै यूं रड़वड़ैला आ कदै जाणी बता
विपत में मंदिर नै मस्जिद जावणो दुर्लभ हुयो
उठै ई ताळा जड़ैला आ कदै जाणी बता
मौत मरतंग री वळा तो मानखो नीं मावतो
दस मिनख सूं दाग व्हैला आ कदै जाणी बता
