पाठा भर-भर गीत कठा सूं लावैलो
हिवड़ा मांई प्रीत कठा सूं लावैलो
जीव हारणो अंत आप ई इण गेलै
सांसां ऊपर जीत कठा सूं लावैलो
अणगढ आखर जियाजूण करै हथाई
अंतस वाल्हो मीत कठा सूं लावैलो
बंतळ खातर आळ्या व्हैता घर मांई
गार मुळकणी भींत कठा सूं लावैलो
मत लड़वा थूं वोटां खातर भायां नै
मंदिर गळै मसीत कठा सूं लावैलो
अेक मिनख री जात जगत में रैणी है
अजर-अमर व्हा रीत कठा सूं लावैलो
गरब-गरब नै उकळ रियो आभै पाणी
धीजां आळी सीत कठा सूं लावैलो
