मुरधर पायो मान गड़ागड़ बरसै बादळियो
हरखै कूंपळ पान गड़ागड़ बरसै बादळियो
अेक रात में लीली व्हैगी खेत बाजरी
भीजै देवळ थान गड़ागड़ बरसै बादळियो
कांकड़-कांकड़ लुळै खेजड़ा मुजरो करबा नै
जळ पीवै मनमान गड़ागड़ बरसै बादळियो
सीळी-सीळी बाज बायरी नित-नित निरत करै
बूंदां चढी कमान गड़ागड़ बरसै बादळियो
ले'र तिणकला चाल्या पंछी नीड़ बणाबा नै
मन मुळकै रजथान गड़ागड़ बरसै बादळियो
कामळ भीजै दादूजी री बाणी सुण-सुण नै
सुण मीरां रो गान गड़ागड़ बरसै बादळियो
गोगो, बाबो रामदेवजी हरखै जांभोजी
नित गावै जसगान गड़ागड़ बरसै बादळियो
टर्र-टर्र गावै गीत मींडका नाचै कूदै
उड़गा छप्पर छान गड़ागड़ बरसै बादळियो
