घर बीती नै कीं समझाणी
सरवर-सरवर गुदळै पाणी
रोज बासदी भर हिवड़ा में
रिनरोही में सुळगै ढाणी
भेंट मुळकतो गांव बायरो
थारी सोबत जग नै भाणी
सबनै पीळा चावळ नूंत्या
दुख पीड़ा री राम-कहाणी
वै उतरैला पार समद रै
घोड़ां चढ ज्यूं फेरै घाणी
फेर सनेसो ले'गी कुरजां
ओजूं कितरी धोक लगाणी
थारो नेह न तूटै गजबण
छमका ज्यूं सौरम पटकाणी
धूणो तापै जोगी सगळा
च्यार खूंट जाजम बिछ जाणी
आज कठा सूं ल्यावां 'मोहन'
राधा जैड़ी वा पटराणी
