चूल्हो चोको गार डीकरी
थळ आभो संसार डीकरी
बायरिया री मीठी सौरम
गीतां री मनवार डीकरी
थां सूं म्हां सूं बंतळ करती
लोपै कोनी कार डीकरी
प्रीत सगाई हिवड़ै राखै
ढाबै घर परिवार डीकरी
सिंझ्या बाती दिवलो हाथां
धरती रो उजियार डीकरी
मीठो सरवर बन रै मांई
सांचों सगपण सार डीकरी
वा बड़भागण निरतै आंगण
मेटे जग रो खार डीकरी
तोड़ै काळ रचाई कारा
ले जा भव सूं पार डीकरी
बाट उडीकै मीरां 'मोहन'
मुळकै टीबा थार डीकरी
