'चीं-ची' मूंडै बोल चिड़कली
थारी पांख्यां खोल चिड़कली
केलू डांडां का घर गुमग्या
भूल्या सगळा कौल चिड़कली
थूं धूड़ा में सांपड़ गावै
सत सायब नै तोल चिड़कली
आभै बरणी मांग हींगळू
धूणा में घी घोळ चिड़कली
थारो म्हारो अेक तजरबो,
अधरां भोळी भोळ चिड़कली
खटमीठा दुख-सुख रा पाया
टणका यांरां टोळ चिड़कली
नित कांधा उचकावै नुगरा
भर झोळा में झोळ चिड़कली
बांकाई नै छोड़ बावळी
बांबी आगे पोळ चिड़कली
कुणनै केवां कुणकै लागै
हुयगी राफड़रोळ चिड़कली
राज भूलग्यो लोकलाज नै
दूखण लागी लोळ चिड़कली
जीव कळपणो थारो म्हारो
निरतै नितका डोळ चिड़कली
