रीतां के रायता में नुक्तियां-सी डुबक्यां लगाती
रीतां घणी मॉडर्न हुयां जा रही छै
अर रीतां को रायतौ, खिंडतो-ढुळतो
पण निभायां जा रह्यो छै।
गणगौर नैं पूजती, पाटा नैं धोती, बाड़ी नैं खोलती
दूब नैं ल्याती, ज्वारा उगाती, हिंडोळो गाती
अर आरतड़्यो उतारती
बायां अर लुगायां की टोळ्यां घणी मॉडर्न हुयां जा रही छै
अर रीता को रायतौ, खिंडतो-ढुळतो
पण निभायां जा रह्यो छै।
ईसर की गणगौर, गणगौर को ईसर
सोळे दिनां को च्याळौ दिन ओक में पूरो हुयां जा रह्यो छै
अर ऑन-लाईन गणगौर पूजती-पूजाती
डोकरियां अर छोकरियां घणी हाईटेक हुयां जा रही छै
अर रीता को रायतौ, खिंडतो-ढुळतो
पण निभायां जा रह्यो छै।
तन-मन सोळा, सात कचौळा, करतां करतां
कम सूं कम सोळा सेल्फी
गणगौर नैं पूजतां आप-आपका ईसर सूं
ऑनलाईन चैटिंग करती आजकल की गणगौरण्यां
घणी मॉडर्न हुयां जा रही छै
अर रीता को रायतौ, खिंडतो-ढुळतो
पण निभायां जा रह्यो छै।
काजल-टीकी-मैंदी की टिमक्यां लगातां
पण बांका ब्रॉण्ड नेम नैं डिस्कस करतां
यू-टयूब पर गणगौर का गीत बजातां
हर रोज की गणगौर पूजा की पिक्स अेफबी पर अपलोड करतां
रीतां घणी मॉडर्न हुयां जा रही छै
अर रीता को रायतौ, खिंडतो-ढुळतो
पण निभायां जा रह्यो छै।
