ऊधो को लैणौ, न माधो को देणौ
म्हैं तो गोविंद, सू प्रीत लगाई जी
जग सारौ झूठौ, खेल भी झूठौ
गोविंद नैं साचौ पाई जी
कोई सूं न लैणौ, कोई नैं न देणौ
कोई सूं न सिकायत पाई जी
गोविंद सुणै म्हारी, बी नै म्हैं सुणाऊं
होवै छै रोज लड़ाई जी
कोई सूं न छानै, कोई सूं न ओलै
कोई की न बात बणाई जी
ओला-झाना करूं म्हारै गोविंद सूं
बी सूं ई नैण लड़ाई जी
रंग-रंगी म्हैं तो गोविंद का रंग में
बी की निजरां पाई जी
रोम-रोम में प्रीत गोविंद की
जग सूं होगी पराई जी
