जियां बाळू सरकै मुट्ठी सूं, बियां’ई जिनगाणी!
दादो बोल्या- उम्र गई रै, करतां पाणी! पाणी!
माखी दांईं फस्या–गिरस्ती,
मकड़ी हाळो जाळ।
टूम-ठीकरी बेची सगळी,
तोड़्यो कियां’ई काळ।
भाईचारो रैयो सदां ई, जीव-जन्त चायै मरग्या,
बो डाकीड़ो छपनो खाग्यो गाँव खेत अर ढाणी।
छोड्या कोनी भुरट,मोथिया,
खेजड़ली रा खोखा।
इण ओदर री आग मांय नै,
बळग्या चोखा-चोखा।
घास-फूस री कांई पूछो भुळस,गया सपनां भी,
इण धोरां में बेरो नीं कुण,तणग्यो दुख री ताणी ।
आज जणां म्हैं देखूं मुड़’र,
रेत रळ्योड़ा बै दिन।
आँख मांयली बण्या किरकरी,
रड़कै बो’ळा अै दिन।
काळ भाजग्यो जळ सूं डरतौ,इण नै कियां भजावां,
इकलापै री डाकण बैठी, घर-घर मिनखां खाणी ।
