बागां बिच बेलड़ी पसरबा लागी
सौरम सा'रै बायरै बिखरबा लागी
चेतौ राखी हाळी-माली
आ है सोनै ईं सूं ढाळी
है रे रूपां सूं रूपाळी
इणरी राखजै रुखाळी
चढ़गी डोळी-डागळै इतरबा लागी
बागां बिच बेलड़ी पसरबा लागी
तांता जाळा सा फैलावै
आता-जातां नै उलझावै
भंवता भोळा नै भरमावै
स्याणी सब रै जी सरसावै
काया ताता दूध सी उफणबा लागी
बागां बिच बेलड़ी पसरबा लागी
उड़ता पंछी रौ मन डोलै
झांके मिट्ठू छांनै-ओलै
कोयल बतळावै सुर तोलै
बोली प्रीत भरी सै बोलै
भंवरां रा ई कानडा कतरबा लागी
बागां बिच बेलड़ी पसरबा लागी
अळियां -गळियां घूमर घालै
सैनां-सैनां में समझाळै
नैणां-नैणा सूं बतळालै
गजबण बेजां ईं बहकाळै
लाजां मरती आंगणौ कुचरबा लागी
बागां बिच बेलड़ी पसरबा लागी
