बागां बिच बेलड़ी पसरबा लागी
सौरम सा'रै बायरै बिखरबा लागी।
चेतौ राखी हाळी-माळी
आ है सोनै ईं सूं ढाळी
है रे रूपां सूं रूपाळी
इण री राखजै रुखाळी
चढ़गी डोळी डागळै इतरबा लागी
बागां बिच बेलड़ी पसरबा लागी।
तांता जाळा सा फैलावै
आता-जातां नै उळझावै
भंवता भोळां नै भरमावै
स्यांणी सब रै जी सरसावै
काया ताता दूध सी उफणबा लागी
बागां बिच बेलड़ी पसरबा लागी।
उडता पंछी रौ मन डोलै
झांकै मिट्ठू छांनै-ओलै
कोयल बतळावै सुर तोलै
बोली प्रीत भरी सै बोलै
भंवरां रा ई कानड़ा कतरबा लागी
बागां बिच बेलड़ी पसरबा लागी।
अळियां-गळियां घूमर घालै
सैनां-सैनां में समझालै
नैणां-नैणां सूं बतळालै
गजबण बेजां ईं बहकालै
लाजां मरती आंगणौ कुचरबा लागी
बागां बिच बेलड़ी पसरबा लागी।
